Ăçта çухалтăн кил хуçи?
Ăçта–ши пĕтрĕн? мĕн тери…
Килмерĕç пĕртте хыпарсем,
Виçĕ кĕтеслĕ çырусем.

Кашни кун куççӳлĕпе
Пăхаттăм почтальон енне —
Анчах пулмарĕç хыпарсем,
Чуна лăшах пусарнисем.

Вăрçă та иртрĕ кĕрлесе
Нумай çынсене пĕтерсе.
Калла таврăнчĕç чăлахсем,
Сахалăн юлчĕç сыввисем.

Нумай килчĕç «хура» хутсем,
Пĕтрĕç, типрĕç куççӳлĕсем…
Çуртасем çунчĕç тĕрлисем,
Илтĕнчĕç тĕрлĕрен ятсем.

Анчах «çухалнă» тенĕрен
Пĕр çăмăллăх киле лекмен:
Пулмарĕç ăшă сăмахсем
Чуна çăмăллăх панисем.

Ывăл çитĕнсе çитиччен
Килте хуçа пек пуличчен,
Сĕтелĕн хушшине ларсан
Çак вырăна никам ларман.

Эс пултăн хисепре ялан:
Сана нихăçан манман —
Тур кĕтесси çине пăхса,
Сăх сăхнă — пайтах асăнса.

Ачасем кĕтрĕç кунсерен
Ӳссе те пĕтрĕç çулсерен,
Ӳсеççĕ халĕ мăнуксем,
Вĕсен куран, çĕн хăватсем.

Мăнук та тухрĕ вĕренсе
Вăрçă енĕпе пĕтерсе,
Киле вăл ячĕ пĕр хыпар:
Чĕре ман çунчĕ шĕл-кăвар.

— Питех те хаклă асанне,
Чуптар-ха военкомат енне!
Унта выртаççĕ хучĕсем,
Асатте çинчен вĕсем!

Эп тепĕр кун иртен ирех
Канаша çитрĕм тӳп-тӳрех.
Хамăн ывăлăмпа пĕрле,
Ухрăмăр иккĕмĕш хутне.

Пĕр çӳллĕ, çирĕп ĕçлекен,
Хитре, пĕлсе калаçакан —
Хĕрарăм, вăтам çулхи,
Кĕтсе илчĕ, сăпай пулни.

Вăл кĕчĕ хирĕç пӳлĕме
Кăштах шырарĕ кирлине,
Сарă хутне алла илсе
Вăл хучĕ сĕтелли çине.

Ман чунăм ячĕ хут çинче:
Çухалман иккен, вăрçинче,
Çапăçнă Польша хулинче,
Варшава ятлă пулнинче.

«Снайпер пули лекнĕрен
Пурнăçĕ пĕтнĕ вилнĕрен».
Кăтартнă унăн вырăнне,
Кăтартнă унăн вăхăтне.

— Савни, мăшăрăм, каçарсам,
Тинех пĕлтĕм санăн çинчен!
Чунна эс панă халăха,
Çапăçнă пулнă паттăрла.

Тарман-çке вăрçă хирĕнчен,
Унта-кунталла сутăнман —
Çапăçнă, вăрçнă тăшманпа,
Ялан пулнă таса чунпа.

Чĕрере хурлăх, ырату,
Тухса тăрать кăна ыйту:
Мĕнле çухалнă сан хуту?
Мĕнле чăтайнă мăшăру?

Çӳле çĕклетĕп сан ятна
Хитре те çутă тĕнчене,
Тухатпăр пысăк уява,
Алра тытса санăн сăнна.

Ывăлăм ыйтрĕ çыннинчен
Хăйне хумхантарни çинчен:
— Пулмас-и çăмăллăх пĕрре,
Мăнуксене, тата пире?

Пулмас халь: иртнĕ вăхăтсем,
Ылмашнă тĕрлĕ «саккунсем»,
Урăх пулмарĕç сăмахсем,
Лăпах арканчĕç ĕмĕтсем.

19.12.2019
12:40