Çӳллĕ чечек çумĕнче
Шăтрĕ-тухрĕ йыт пырши —
Ачашласа çӳлçипе,
Çыпçăнчĕ унăн çумне.
Ыталать те ачашлать:
Хăйне пулăшма ыйтать
Çӳлелле ухса пыма,
Унтан пулăшу ыйтать.
Хирĕç пулмас чечекĕ:
Ирĕк парать кăмăлпа —
Иккĕн пулĕ лайăхрах,
Пĕрле пулĕ хавасрах!
Çумкурĕкĕ кунсерен
Явăнать те явăнать.
Ухса пырать çӳлелле,
Пăвма пуçлать чечеке.
Хăйĕн парка çӳлçипе
Хупăрлать-çке хĕвеле.
Мĕнле йывăр чечеке
Чăтма кĕтмен инкеке.
Халĕ ĕнтĕ вăл хуçа:
Çӳлтен пăхать ун çине!
Ярса илнĕ ун чунне,
Сăхса илнĕ сĕткенне.
Çӳлçи кайнă сарăхсах,
Çеçки сӳннĕ самантрах —
Çак çумкурăк пуснăран,
Пĕтсе кайнă пĕтĕмпех.
Шанчĕ, сӳнчĕ илемĕ,
Тепĕр чуна шаннăран.
Ăна йывăр вăхăтра
Хăйĕн вăйне панăран.
21.04.2019
Вуланă: 169
Килĕшнĕ сăвăна ытти çынсене ярса пама пулать. Тавтапуç сире!