Тăнă вăрман шавлавса,
Вăйне панă халăха —
Пĕренесем, вутăсем,
Утăсемпе каштасем.

Кунта тĕрлĕ чĕрчунсем,
Кӳлĕсенче пулăсем,
Пысăк кăна утарсем,
Çирĕп кăна юмансем.

Çулла пухнă çырлине,
Çăлнă вăрман курăкне,
Хатĕрленĕ милĕкне,
Кăмпа татнă тĕрлине.

Пулнă вăрманта таса —
Тăнă халăхĕ пăхса,
Пĕтерсессĕн ĕçсене,
Пурте килнĕ савăнма.

Хитре кăна хĕрĕсем
Шăрантарнă юрăсем,
Вăйне виçнĕ каччăсем,
Вирлĕ пулнă вăйĕсем.

Вăрман тăнă кĕрлесе,
Савăнса та сĕрлесе.
Уçă сывлăш вăрманта,
Кăмăл пулнă вырăнта.

Халăх килнĕ ушкăнпа
Тĕрлĕ-тĕрлĕ ĕç тума.
Ватти-вĕтти, вăй-питти —
Халĕ пулмас ун пекки.

«Маняç» тенĕ лесника
Пурте пĕлнĕ таврара:
Пăхса тăнă вăрмана,
Ĕçлеттернĕ халăха.

Йывăç каснă суйласа,
Пит хĕрхеннĕ вĕсене!
Илсе тухнă çул çине
Лашасемпе сĕтĕрсе.

Икелсене пуçтарма
Пурте килнĕ кунталла,
Илсе кайнă ялалла,
Тулса çитсен урапа.

Сарă, типĕ çӳлĕçсе,
Шăлнă шăпăрсем туса,
Тӳшексене тултарса,
Хунă урапа çине.

Выльăхсене çитерме,
Вĕсен айне те сарма,
Хатĕрленĕ тăрăшса,
Мачча тăррине хума.

Хитре çăка хуппине
Шыва чикнĕ пусарса —
Ик эрне ытла выртсан,
Сӳнĕ мунчала унтан.

Чăпта çапнă Кармалта
Кунĕпе те çĕрĕпе,
Трактăр çуни туличчен,
Ăна çыхса хуриччен.

Умлă-хыçлă трактăрсем
Илсе кайнă тавара:
Укçа илсен, ĕçченсем,
Илнĕ тĕрлĕ таварсем.

Çамрăк çынсем вуласан,
Кăшт тăраççĕ шутласа:
Кама кирлĕ пурнăçра
«Чăпта» тенĕ япала?

Вутăсем те кирлĕ мар —
«Кăвак çулăм» ялкăшать!
Стенисем те блоксенчен,
Пĕрене те кирлĕ мар!

Шăпăрт халĕ вăрманта:
Кураймастăн сукмака,
Хуçăк кăна йывăçсем,
Çăрса кайнă тракторсем.

Халĕ вăйлă пăчăксем
Уй тăваççĕ вăрмантан,
Тытса каснă пĕтĕмпе,
Укçа тума вĕсемпе.

Халăх курать вутăна
Трактăрпала килнине.
Анчах ăçта юмансем,
Сарă кăна çăкасем?

Пысăк лаптăк çаралсан,
Лартнă пĕчĕк хунавсем.
Хăçан ӳсĕç йывăçсем,
Черчен кăна пулнисем?

Пĕрене пулса çитме
Çын ĕмĕрĕ çитеймен.
Мĕн юлайрĕ пирĕнтен,
Туйра кăна çитĕнсен?

Юман пулма, çитĕнме,
Кирлĕ икçĕр çул ытла!
Çăка, юман çухалать,
Хырпа чăрăш хирĕлет.

Вăрман айккинчен кăна
Çӳллĕ, тикĕс курăнать —
Кĕрсен, кăштах шалалла,
Чунăм питĕ ыратать?

Вăрмансене, уйсене,
Кайрĕç çынсем пăрахса —
Ял çыннисем хулана,
Утрĕç ирĕксĕр тухса.

Пурнăçра укçа хуçа:
Хăвалать вăл пур çынна!
Анчах ĕçĕ пулмасан,
Эс кураймăн укçуна!

Çамрăк кайнă Мускава,
Çамрăк кайнă Çĕпĕре,
Çамрăк кайнă хулана —
Ялĕ юлнă пушанса.

Хушса хуни:
«Маняç» — Алексеев, тăрмăшри лесник.
Пĕрремĕш арăмĕ Тăвайĕнче продавец пулса ĕçленĕ?

22.10.2018