Ăшă, вăрăм кĕркунне,
Савăнтарать хăш чухне:
Сайра пулать пурнăçра,
Кĕрхи кунĕ хĕртĕнме.

Вăрмансем те саралман,
Çӳлçĕ ӳкме пуçламан,
Хур-кайăкĕ кăнтăра,
Вĕçсе кайма шутламан.

Çуллахи пек кунсенче
Тыр-пул пухрĕç уйсенче —
Тырă кĕчĕ пит таса,
Хучĕç часах пуçтарса.

Тип çанталăк пулнăран,
Кăмпасем те тухайман —
Вутă-шанкă пуçтарма,
Майлă пулчĕ вăрманта.

Уйсене сухалама,
Утăсене пуçтарма,
Улăмсене тюклеме,
Турри пачĕ майлама.

Çирĕпрех çынсем куллен:
Шыва кĕнĕ кунсерен?
Сарă хăйăр çийĕнче:
Майĕ пулнă хĕртĕнме?

Тăм та ӳкме пуçламан —
Кун пекки тахçан пулман!
Умра помидор ларать,
Йăран çинче хĕрелет!

Çут-çанталăк пулăмне
Кăшт куçарнă айкине.
Çулла пулчĕ юларах,
Кĕрĕ кайрĕ вăрăмрах.

Ăшă каçсем ку чухне
Савăнтарчĕç çынсене.
Уйăх пăхрĕ тăрăшса,
Вĕсем çине çутатса.

Пурте пĕрле савăнар,
Çут-çанталăка ырлар,
Аса илер ыррине,
Тахçан пулса иртнине.

Календарĕ кăтартать:
Октябрь ыран тăрать,
Ăшă, типĕ кун шăвать,
Чунăма савăнтарать.

Çут-çанталăк кăмăлне,
Йывăр çулсерен пĕлме —
Пăхса тăмас вăл пире,
Хăйĕннех тăвать ĕçне.

24.09.2018