Урамра хĕвел ăшши,
Чӳречесем яр уçи,
Хĕрсе кайса лапталла,
Кускалать ачи-пăчи.

Арçынĕсем савăнса,
Пĕрле лапта выляççĕ —
Мечĕке хытă çапса,
Таçта çити яраççĕ.

Çурхи шывĕ юхтарса
Кайнă урама шырса,
Мечĕк çине пăхакан,
Канава кĕрсе ӳкен.

Мăнкунĕ пырать хĕрсе,
Юнкун календарь çинче,
Пĕри пуçне кăларса,
Ячĕ хыттăн кăшкăрса:

— ГАГАРИН çут уçлăхран,
Анса ларнă космосран!
Итлĕр пурте хыпара,
Вăйлатап радиона!

Пурте тухрĕç урама,
Ур-р-а! Ур-р-а! кăшкăрма.
Ыталаççĕ пĕр-пĕрне,
Кăшт сикеççĕ çӳлелле!

Ун пек вăйлă савăнни
Курман урăх ун майли!
Çак ĕмĕре çитиччен,
Пулман пулĕ халиччен.

Кăштах вăхăчĕ иртсен,
Кайрĕ сывлăш чĕтресе:
Вĕçсе иртрĕç пуç çинчен,
Вертолетсем кĕрлесе.

Мĕкĕреççĕ ĕнисем,
Макăраççĕ сурхисем,
Кайăк-кĕшĕк хумханса,
Вĕçет унта-кунталла.

Çак асамлă вăхăтран
Тĕнче яри уçăлчĕ,
Пĕтĕм халăх çĕр çинче,
Ур-р-а! Ур-р-а! кăшкăрчĕ.

Корольсемпе патшасем
Черет тăчĕç ал пама —
Ăçта кăна вăл пулман,
Ăçти вырăна çитмен!

Акăлчан патши, куран,
Чĕннĕ ăна хаклăран:
Юнашар унпа ларса,
Пит калаçнă савăнса.

Панă хаклă парнине,
Çăмăл машин пулнине,
Номер лартнă çĕннине,
Пĕрремĕшĕ пулнине.

Çĕклесе машинăна
Халăх утнă малалла!
Вăйлă туйăм килнĕрен,
Чысĕ пысăк пулнăран!

Пит сăпайлă кулнăран,
Тĕлĕннĕ Гагаринтан.
Пичĕ çинчи кулăпа
Илнĕ ялан тыткăна.

Пĕр тан пулнă вĕсемпех,
Е татах та çӳлерех,
Пит уçăмлă пулнипе,
Тĕлĕнтернĕ ăсĕпе.

Тĕрлĕ-тĕрлĕ парнесем,
Хаклă, чаплă орденсем,
Панă тĕрлĕ çĕршывсем,
Сума сунă халăхсем.

«Звездный» ятлă хулана
«Монинăран» каймалла:
Унта хаклă парнисем,
Упранаççĕ пахисем.

Ячĕ юлчĕ ĕмĕре:
Пĕтĕм–пĕтĕм тĕнчере —
Асăнаççĕ йăлипе,
Ырăпала Паттăра!

12.05.2019