Çак тĕнчене ăнланма,
Ăшри туйăма уçма,
Пĕтĕм ĕçе хускатма,
Чĕлхе кирлĕ калама.

Чĕлхерен тухать сăмах,
Шухăшне парать тӳрех:
Вăйĕ унăн хăватлă,
Тепĕр чухне — асамлă.

Хумхатать пĕтĕм чуна
Хăват парать чĕрене.
Туян хăвна паттăрла,
Шухăшлатăн улăпла.

Ăшă сăмах ăшăтать,
Çĕнĕ — çĕнĕ вăй парать,
Çĕклет туйăм-кăмăла,
Каян малтан малалла.

Çунат парать сăмахпа,
Вăйне хушать самантра.
Вĕрет вăй-хал ӳт-пӳре,
Тытса тăван пур ĕçе.

Усал сăмах сивĕтет —
Çан-çурăма чĕтрететь,
Авать, хуçать, пĕтĕрет,
Вăй-халăма пĕтерет.

Çĕклет, çапать, çĕмĕрет,
Ураран та ӳкерет.
Чирлеттерет, хавшатать,
Кун çула та кĕскетет.

Кĕвĕç сăмах çунтарать,
Ăш-чикĕме хуратать,
Шанăçа та çухатать,
Урăхла пăхма хушать.

Пулччĕр ырă сăмахсем
Пулччĕр çутă кăмăлсем,
Паччĕр çĕнĕ вăй–хала —
Уçчĕр пирĕн кăмăла!

25.10.2019
10:33