Аслă урам сарлака —
Хĕрĕх утăм та ытла,
Çулăн икĕ енĕпе,
Ĕлĕк лартнă хурăна.

Тĕрлĕ ялăн çыннисем:
Вăтаялпа Кармалсем,
Витĕр тухнă ялпала,
Тăвайне утнă çулпала.

Çӳлти касран, ăнсăртран,
Кунĕ шăрăх тăнăран,
Пушар тухнă алхасса
Ял халăхне хăратса.

Хыпса илнĕ хурăнсем,
Вĕçнĕ çӳле çулăмсем.
Анаткасăн çӳлĕпе
Усал çавра çилĕпе.

Улăм витнĕ çурчĕсем,
Кĕлетсемпе витесем,
Çунса кайнă эретпе —
Çуннă, пĕтнĕ пĕтĕмпе!

Пушар пынă алхасса,
Кĕрлесе те уласа,
Хаяр кăна çулăмпа,
Вĕри, усал сывлăшпа.

Пĕтĕм халăх пухăнса
Тăнă пушара чарма.
Анчах вĕри пулнăран,
Нимĕнех те тăвайман.

Ачи-пăчи, ват çынни,
Кăшкăрнă шари-пăри!
Чупнă пурте çырмана
Чунĕсене хăтарма!

Хирĕç тухнă пушара
Ватă, турăша тытса:
Тĕрлĕ сăмах юптарса,
Тухнă пӳрт тавра утса.

Çулăм сикнĕ çӳлелле!
Çулăм сикнĕ айккине!
Çакă пӳрте тĕкĕнмен,
Хуралчĕсе çунтарман.

Аслă Турă, тĕлĕнен,
Пӳрте çăлнă пушартан!
Сивĕ çилĕ вĕрнĕрен,
Сирсе янă çулăмран!

Вăй-хăватсем вăйлисем
Ăнланма çук пулăмсем —
Хӳтĕленĕ инкекрен,
Çăлнă çурта хĕлхемрен.

Çитмĕл киле яхăнах,
Çур ялтан та ытларах!
Çунса пĕтнĕ пĕтĕмпех!
Çынсем юлнă нимсĕрех.

Мĕнле хĕле кĕмелле?
Ăшă кĕтес тупмалла?
Мĕн çитерес чунсене?
Ăçтан тупас тум-тирне?

Çитнĕ таран вăйĕсем,
Пулăшнă халăха вĕсем.
Пӳрт тума, кĕлетсене,
Панă тĕрлĕ çынсене.

Ĕлĕк пулнă пушара
Çынсем мансах пыраççĕ.
Çамрăккисем вара
Ним калама пĕлмеççĕ.

Аслă, аслă, мĕн ватти,
Атте-анне калани,
Куçса пырать ĕмĕре,
Аса илет вĕсене.

09.10.2018