Хамăра упрамасан,
Пурнăçа хĕрхенмесен,
Пуçупа шутламасан,
Пулĕ кĕске çулу сан.

Тăвайĕнчи пасарта
Тутар сутнă шушкине —
Кунсем кĕске тăнăран,
Сутса ăна пĕтермен.

Çуна çине çыхăна
Хунă юнашар ăна,
Тăвайĕнчен килелле,
Вăл чуптарнă лашине.

Çуна çулĕ çумĕпе
Çамрăк пынă майĕпе:
Çав хуçаран утакан
Шушкă ыйтнă тутартан.

Хĕсĕк пулнă укçаран,
Е укçи те ун пулман:
Йăлăннă вăл сутăçран,
Тутлă çимĕçе пама.

Тутар хирĕçех пулман,
Шӳтлесе те кăшт кулса:
— Ут-ха çарраннах утса,
Ялу патнех çитиччен!

Хăвăрт çăпата салтса,
Тăлине алла илсе,
Утнă пăрлă çулпала
Çуна хыççăн малалла.

Кăна пачах та кĕтмен
Çуна çинче ларакан —
Тавара çăлас тесе
Вăл тăрăшнă май таран.

Лаша малалла чупман,
Утнă майĕпен кăна,
Анчах çамрăк парăнман,
Утнă сиввĕне чăтса.

Çитнĕ ял патне утса,
Кайнă урисем хытса!
Тавара килне çитсен
Çакса хунă пăтаран?

Тепĕр кунне, тамаша,
Пултарайман калаçма!
Ура çине тăрайман,
Кучченеçне çиеймен.

Нумаях та пурăнман,
Чунĕ урăх чăтайман:
Куçсем шывлă мĕскĕнĕн
Шушкă енне пăхнăран.

Тепĕр тĕслĕх пурнăçран:
Каччă шутне кĕреймен,
Çирĕп, патвар ачана
Шăхлич килĕшнĕ чунтан.

Шăхлич хуçи пит чее,
Кулнă каçăхса ăшра:
«Ĕç-ха эсĕ çур витре
Çăлран ăснă сив шыва!»

Лешĕ тăман шутласа —
Лăнкăр-ланкăр тутарса
Ĕçсе янă çав шыва,
Аран кăна сывласа.

Ĕçсе ярсан амакка
Пĕрĕхтернĕ каялла!
«Шăнса вилетĕп!» тесе,
Йăваланнă çĕр çинче!

Шăхличĕ те кирлĕ мар,
Чуну тухма пуçласан!

10.10.2018