Чăн пулни

Канаш пасарне кайса,
Кантăк касма, ĕç тума —
Атте илнĕ ват çынтан,
Кантăк касма алмаза.

Лайăх кăна сăрантан
Тунă унăн енчĕкне,
Паллă лартнă çиелтен
Хăш енчине пĕлтерме.

Йывăç авăрĕ хура,
Авăрăн хăрах енче —
Шурă кăна çаврашка,
Каснă слонăн шăмĕнчен!

Тытрĕ атте алмаза
Пăхать кăна тĕлĕнсе —
Кун пек пысăк кристалла
Курать пуçласа кăна.

Илчĕ кантăка шăлса —
Унăн таса пулмалла!
Хучĕ тӳрĕ рейкăна
Тытрĕ алмазпа касма.

Пырать ахах чăйлатса,
Çинçе сасă кăларса.
Тӳрех ӳкрĕ аялла
Кантăк татки касăлса.

Хатĕрĕ çивĕч кăна,
Асăрханса тытмалла!
Ан пус вăйпа, ан васка,
Аври тӳрĕ пулмалла.

Ан тух эсĕ хĕррине —
Пĕтеретĕн хатĕре,
Хăвăн ĕçне вĕçлесен,
Енчĕке чиксе хуран.

Кантăк касса ахахпа
Тĕлĕнтерчĕ ял-йыша.
Ялти тĕрлĕ кантăксем
Якур-атте лартнисем!

Анчах пĕр çын йăлăнать:
Алмаза пама ыйтать!
— Хамах касăп, ан çӳре,
Парса яр-ха ĕçлеме!

Тепĕр икĕ эрнерен
Тупрĕ вăл çынна аран!
Инçетре кантăк касса,
Вăл çӳренĕ кастарса.

Çивĕч алмаз хысакĕ
Катăлса йăлтах пĕтнĕ!
Шăйăрать вăл кантăка,
Йĕрет нăйкăш сасăпа!

Хитре кăна ахаха,
Ватрĕ тăват катăка —
Пĕр хитререх пĕрчине,
Вырнаçтарчĕ вырăнне.

Касаймарĕ лайăххăн
Кантăка вăл çăмăллăн.
Асра юлчĕç ĕçĕсем
Хитре кăна каснисем.

25.08.2018